Okkur hjá Kormáki og Skildi og Epal er sönn ánægja að tilkynna að í fyrsta skipti í tæp 50 ár þá er hafin framleiðsla á íslensku “ Tweedi “ eða Vaðmáli eins og það hét fyrr á öldum. Vaðmálið var gjaldmiðill okkar í viðskiptum við útlönd í gegnum aldirnar.

Á hönnunarmars fögnum við verkefni sem Kormákur og Skjöldur hafa verið að undirbúa í nokkur ár. Framleiðsla á íslensku vaðmáli úr íslenskri ull. Vara sem hefur ekki verið framleitt hérlendis síðan á sjöunda áratug síðustu aldar.

Sú var tíðin að íslenskt vaðmál var framleitt hérlendis. Öll stig framleiðslunnar voru unnin hér. Allt frá því að bóndinn afhenti hráa ullina, ullin var hreinsuð og þvegin, kembd og spunnið úr henni ullarband. Bandið var svo ofið í vaðmál sem var notað í fatnað, teppi, áklæði og margskonar aðra hluti.

Hjá Kormáki og Skildi höfum við haft það markmið að snúa þróuninni við þegar kemur að vefnaði úr íslenskri ull. Okkar sýn er að iðnaðarvefnaður úr íslenskri ull komist aftur á laggirnar hér á landi. Því höfum við hafið framleiðslu á íslensku vaðmáli bæði fyrir innlendan og erlendan markað.

Íslenska vaðmálið hefur vakið athygli eiganda húsgagnaverslunarinnar Epal sem frábær kostur í áklæði fyrir innlenda sem og erlenda húsgagnaframleiðendur. Efnið hefur staðist allar gæðaprófanir og er leitast við að varan sé í senn nátturuvæn og með sömu gæði og samkeppnisaðilar erlendis bjóða upp á. Epal kynnir húsgögn sem bólstruð eru með íslensku vaðmáli sem nýjan spennandi valkost í húsgagnaframleiðslu á Hönnunarmars.

Í verslun Epal má finna hinn heimsþekkta EJ 270-3 sófa frá Erik Jörgensen þar sem fyrirtækið hefur notað hið íslenska vaðmál í framleiðsluna.  Einnig eru til sýnis tvær útgáfur af hinum sígilda Kjarvalsstól klæddum íslensku vaðmáli.

Á sama tíma kynnum við Klæðskerastofuna hjá Kormáki & Skildi sem er nýtt stórverkefni unnið í samstarfi við klæðskerana Birnu Sigurjónsdóttur og Rakel Ýr Leifsdóttur og Ragnar Kjartansson myndlistarmann. Þar er vaðmálið einmitt í burðarhlutverki. Klæðskerastofan á sér enga líka hér á landi. Gæði á heimsmælikvarða þar sem fötin eru sérhönnuð, sniðin og saumuð á Laugaveginum að þörfum og smekk viðskiptavinarins enda klæðast sannir heiðursmenn alvöru handverki. Hér ber að líta klæðskerasaumaðan jakka í vinnslu.

 Verðlisti pr. meter

Verð 1-15 metrar, 19.900
Verð 50-100 metrar, 18.900
Verð 100-200 metrar, 17.900
Verð 200-300 metrar, 16.900
Verð 300 - 1000 metra, 15.900